For the English version of this article, click here.

ᐊᔪᕆᖅᓱᐃᔨᕐᔪᐊᖃᕐᕕᑦᑎᓐᓂ ᑖᓐᓇ

ᐊᔪᕆᖅᓱᐃᔨᕐᔪᐊᖃᕐᕕᑦᑎᓐᓂ ᑖᓐᓇ ᑎᒥᑐᐃᓐᓇᐅᖏᓚᖅ, ᐱᓕᕆᖃᑎᒌᑦᑎᐊᖃᑦᑕᖅᓯᒪᕗᒍᑦ ᐅᖓᓯᒃᑑᑎᐅᒐᓗᐊᕐᑎᓪᓗᒋᑦ ᓄᓇᓕᐅᔪᑦ. ᐱᓕᕆᖃᑎᒌᒍᓐᓇᕐᓂᕆᔭᖓᑦ ᐱᐅᔪᐊᓘᕗᖅ. ᒎᑎᐅᑉ ᐅᖃᐅᓯᖏᑦ ᒪᓕᒡᓗᒋᑦ ᑕᒪᓐᓇ ᑐᒃᓯᐊᕐᕕᖕᓄ ᐋᕿᒃᓱᖅᓯᒪᓂᕆᔭᖓ ᑎᒥᐅᑎᓪᓗᒍ ᐸᔅᑑᓯᒧᑦ ᓄᓕᐊᒃᓴᖅ ᐅᐃᒃᓴᒥᓂᒃ ᐅᑕᖅᑭᓪᓗᓂ. ᐅᖃᒃᑲᓐᓂᕋᔭᕈᒃᑯ ᓲᕐᓗ ᐊᓂᖕᓂᖅ ᐃᔾᔪᕐᓇᐃᑦᑐᒧ ᐃᑲᔪᖅᑕᐅᓪᓗᑎᒃ ᐱᓕᕆᖃᑎᒌᖕᓂᒃᑯᑦ ᓯᕗᒻᒧ ᐃᖏᕐᕋᕙᓪᓕᐊᓂᐅᔪᖅ ᐅᒃᐱᖅᑑᖃᑎᒌᓄᑦ, ᑕᒪᓐᓇ ᑎᒥ ᐅᐃᒃᓴᒥᓂ ᑕᐃᒪᙵᓕᒫᖅ ᐊᑕᐅᓯᐅᖃᑎᒌᖏᓐᓇᖅᐳᑦ ᑐᒃᓯᐊᕐᕕᒃ ᐃᖏᕐᕋᑎᓪᓗᒍ ᐸᔅᑑᓯᐅᑉ ᑎᒥᖓᓂ.

ᑕᒪᓐᓇ ᑕᑯᖃᑦᑕᖅᐸᕗᑦ ᐱᓕᕆᖃᑎᒌᖕᓂᕆᖃᑦᑲᖅᑕᕗᑦ ᐊᔾᔨᒌᖏᑦᑑᑎᒍᑦ ᐱᓕᕆᓂᐅᓪᓗᓂ ᑭᓯᐊᓂᓕ ᐅᓇ ᓇᓗᓇᐃᒃᑲᓐᓂᕈᒪᕙᕋ ᓱᕈᓰᑦ ᒪᒃᑯᒃᑐᓪᓗ ᐅᒃᐱᖅᑑᖃᑎᒌᖕᓂᕐᒥ ᐱᓕᕆᐊᖃᕋᓱᐊᖅᑎᓪᓗᒋᑦ ᐊᒃᑐᐃᖃᑦᑕᖅᓯᒪᓂᕆᔭᖓ ᑐᒃᓯᐊᕐᕕᖕᒥ. ᑕᒪᒃᑯᓂᖓ ᐱᓕᕆᐊᖃᖅᑎᓪᓗᑕ ᑐᙵᕕᓕᐅᖅᓯᒪᑎᓪᓗᑕ ᑐᒃᓯᐊᕐᕕᖕᒥ ᒪᒃᑯᒃᑐᓄ ᑖᓐᓇ ᐃᓕᓐᓂᐊᖅᑎᑦᑎᓂᑐᐃᓐᓇᐅᖏᓚᖅ ᐅᒃᐱᖅᑑᖃᑎᒌᓂ ᐅᒃᐱᕐᖕᓂᒃᑯ ᑭᓯᐊᓂᓕ ᐱᓪᓚᕆᐊᓘᕗᖅ ᑕᒪᓐᓇ ᐱᕈᖅᐸᓪᓕᐊᑦᑎᐊᖁᓪᓗᒍ ᐃᓅᓯᖕᒥᓂ ᐃᓅᓯᕆᔭᖏᓐᓂ ᑐᒃᓯᐊᕐᕕᖕᒥ ᐊᒻᒪᓗ ᐱᓪᓚᕆᐊᓘᓪᓗᓂ. ᑕᒪᒃᑯᐊ ᓱᕈᓰᑦ ᒪᒃᑯᒃᑐᓪᓗ ᐃᓕᓐᓂᐊᖅᑎᑕᐅᖃᑦᑕᖕᓂᕆᔭᕆᐊᖃᖅᑕᖏᓐᓂ ᑭᖑᕚᕇᓂ ᑭᖑᕚᕇᓄ ᐃᓄᖕᓂ ᓯᕗᓕᖅᑕᐅᓪᓗᓂ ᑐᒃᓯᐊᕐᕕᖕᒥ ᐊᒻᒪᓗ ᓄᓇᓕᓂᙶᖅᑐᒥ ᓯᕗᓕᖅᑎᖃᖕᓂᕐᒥ ᐊᑐᖅᖢᑎᒃ ᐸᔅᑑᓯᒃᑯ.

ᐅᒃᐱᖅᑎᐅᓇᓱᐊᖕᓂᖅ ᐱᓪᓚᕆᐅᕗᖅ. ᑐᒃᓯᐊᕐᕕᖕᒥ ᐃᓚᐅᓂᖅ ᑕᒪᓐᓇ ᖁᙱᐊᖕᓂᑐᐃᓐᓇᐅᖏᓚᖅ, ᑐᒃᓯᐊᕆᐊᖅᑎᐅᔪᓪᓕ ᑭᒃᑰᓂᖏᓐᓂ ᐱᔪᓐᓇᖅᓯᕙᓪᓕᐊᓂᕆᔭᖏᓐᓂᒡᓗ ᐅᕐᐱᖕᓂᓕᕆᓂᖕᒥ. ᑖᓐᓇ ᑎᒥ ᑐᒃᓯᐊᕐᕕᖕᒥᓪᓗ, ᐅᑭᐅᖅᑕᖅᑐᒥ ᑖᒃᑯᐊ ᓄᓇᓖᑦ ᐊᒻᒪᓗ ᐊᖏᕐᕋᖃᕐᕕᐅᔪᑦ. ᐃᓕᓐᓂᐊᖅᑎᐅᒐᑦᑕ ᐃᓕᐸᓪᓕᐊᓪᓗᑕ ᔩᓱᓯ ᐸᔅᑑᓯᒥᑦ. ᑭᓯᐊᓂᓕ ᐃᕐᖕᓂᐊᖑᔭᕇᖅᓯᒪᖏᓚᓱᓕ. ᑕᒪᒃᑯᓂᖓ ᐱᓕᕆᐊᖃᕋᓱᐊᖕᓂᐊᖅᑎᓪᓗᒋᑦ ᓲᕐᓗ ᐸᑉᑎᑎᕆᓂᒃᑯ ᐃᒥᖕᒥ ᐊᑐᑦᖢᓂ ᐃᓕᓐᓂᐊᖅᑎᙳᖃᑦᑕᖕᒪᑕ ᑕᒪᓐᓇᓗ ᐃᓕᓐᓂᐊᖅᑎᐅᓂᖕᒧ ᓯᕗᒧ ᐱᓕᕆᖃᑎᒌᒃᐸᓪᓕᐊᓂᒃᑯ ᐃᓕᓐᓂᐊᖅᑎᑦᑎᓂᒃᑯ ᐊᔪᕆᖅᓲᔾᔨᓂᒃᑯ ᑕᒪᓐᓇ ᐊᑐᕐᓗᒍ ᑭᓯᐊᓂᐅᔭᕆᐊᖃᖃᑦᑕᖅᐳ. ᐊᔪᕆᖅᓱᐃᔨᕐᔪᐊᖑᒐᓗᐊᖅᑎᓪᓗᖓ ᐃᓕᓐᓂᐊᖅᑎᐅᕗᖓᑦᑕᐅᖅ, ᐃᓕᓐᓂᐊᖅᑎᐅᖃᑎᓐᓄᓪᓗ ᐃᑲᔪᖅᑕᐅᖃᑦᑕᖕᓂᓐᓄ ᑭᓯᐊᓂ ᐱᓕᕆᖃᑎᒋᓪᓗᒋᓪᓗ ᑲᔪᖏᖅᓴᐃᓂᕆᖃᑦᑕᕐᓂᖏᓐᓄᓪᓗ ᑲᔪᓯᔪᓐᓇᖅᐳᖓ ᐃᓅᓯᓐᓂ.

ᑕᒪᓐᓇ ᑕᕙ ᐱᔾᔪᑎᐅᔪᖅ ᐃᓕᓐᓂᐊᖅᑎᖑᖅᑎᑦᑎᕙᓕᐊᓗᑕ ᐱᓗᐊᖅᑐᒥ ᒪᒃᑯᖕᓂᖅᓴᐅᔪᓂᒃ. ᖃᐅᔨᒪᕖ ᐃᓕᓐᓂᐊᖅᑎᑦᑎᔭᕌᖓᑦᑕ ᑲᔪᖏᖅᓴᐃᔭᕌᖓᑦᑕᓗ ᖃᓄᐃᑉᐹᓪᓕᖅᐸᖕᒪᖔᑕ. ᓄᓇᓕᒃ ᖃᓄᐃᖏᑉᐹᓪᓕᕈᓐᓇᖅᐳ, ᖃᑕᖑᑎᒌᓪᓗ ᖃᓄᐃᖏᑉᐹᓪᓕᕈᓐᓇᖅᐳᑦ ᐊᒻᒪᓗ ᐅᒃᐱᕐᖕᓂᖕᒥ ᓯᕗᓕᖅᑎᖃᑦᑎᐊᖕᓂ ᑕᒪᓐᓇ ᐊᑑᑎᖃᑦᑎᐊᖅᐳ ᑐᒃᓯᐊᕐᕕᖕᒥᑐᐊᖑᖏᑦᑐᖅ ᑖᒃᑯᐊᓗᑕᐅᖅ ᒐᕙᒪᒃᑯᓐᓄ ᐊᒻᒪᓗ ᑎᒥᐅᔪᓄ ᐊᔾᔨᒌᖏᑦᑐᓄ. ᑖᓐᓇ ᐆᒃᑑᑎᒋᔪᓐᓇᖅᐸᕋ ᐊᔪᕆᖅᓱᐃᔨᒃᓴᓄ ᐃᓕᓐᓂᐊᕐᕕᒃ. ᐊᐱᕆᒐᔭᖕᓂᕈᕕᑦ ᐃᓕᓐᓂᐊᕆᐊᓚᐅᖅᓯᒪᔪᕕᓂᖕᒧ ᐊᔪᕆᖅᓱᐃᔨᒃᓴᐅᓂᖕᒧ ᖃᓄᐃᒻᒪ ᐃᓕᓐᓂᐊᕆᐊᖕᓂᖕᒪᖔᑦ, ᐊᒻᒪᓗ ᒎᑎᒧᑦ ᑎᓕᔭᐅᓯᒪᓂᖕᒥᓂ ᐊᔪᕆᖅᓱᐃᔨᐅᓂᖕᒧ. ᐅᓄᖏᓂᖅᓴᐅᔪᑦ ᑭᐅᒐᔭᖅᑐᑦ ᐅᒃᐱᖅᑑᖃᑎᒌᓄᑦ ᑲᔪᖏᖅᓴᖅᑕᐅᖃᑦᑕᖕᓂᖕᒥᓄ ᐊᒻᒪᓗ ᑐᓂᕐᕈᓯᐊᖅᓯᒪᓂᖕᒥᓄ ᐊᔪᕆᖅᓱᐃᔨᐅᓂᖕᒥ. ᐱᓪᓚᕆᐅᔪᒥ ᓄᓇᓕᖕᓂ ᓄᓇᓖᓪᓗ ᐊᓯᖏᓐᓂ ᑕᒪᓐᓇ ᑐᓂᕐᕈᓯᐊᖕᓂᖅ ᐊᔪᕆᖅᓱᐃᔨᐅᓂᖕᒧ ᐱᕈᖅᐸᓪᓕᐊᕙᒃᐳᖅ ᐊᔪᕆᖅᓱᐃᔨᖑᖅᐸᓪᓕᐊᔪᓂ. ᐃᓚᒃᑲᓐᓂᕐᓗᒍᓗ ᑕᒪᒃᑯᐊ ᐊᔪᕆᖅᓱᐃᔨᖑᖅᐸᓪᓕᐊᔪᑦ ᐱᕈᖅᓯᒪᓂᖅᓴᐅᕙᒃᐳᑦ ᐅᒃᐱᖕᓂᒃᑯ ᐃᓕᓐᓂᐊᖅᑎᑕᐅᔭᕌᖓᒥᒃ ᐊᒻᒪᓗ ᐃᑲᔪᖅᑕᐅᑦᑎᐊᕌᖓᒥ ᓄᓇᒥᖕᓂ.

ᐱᔭᕇᖅᐸᓪᓕᐊᑎᓪᓗᖓ ᓂᓪᓕᐅᑎᒋᒃᑲᓐᓂᕈᒪᕙᕋ ᐅᓇ, ᓇᓂᑐᐃᓐᓈᕋᓗᐊᕈᕕᑦ, ᓇᒦᒃᑲᓗᐊᕈᕕᓪᓗ ᑕᑯᒋᐊᒃᑲᓐᓂᕆᑦ ᒪᒃᑯᒃᑐᑦ ᑲᔪᖏᖅᓴᖅᑕᐅᒃᑲᓐᓂᕆᐊᖃᖕᓂᖏᓐᓂ ᐊᒻᒪᓗ ᐃᑲᔪᖅᑕᐅᒃᑲᓐᓂᖕᓂᕆᔭᕆᐊᖃᖅᑕᖏᒃ. ᑐᒃᓯᐊᕐᕕᖕᒦᑉᐸᑕ ᐅᐸᒡᓗᒋᑦ, ᐅᕙᓘᓃᑦ ᐊᐱᕆᔪᓐᓇᖅᐳᒍ ᒎᑎᒧ ᒪᒃᑯᒃᑐᒥ ᓴᖅᑭᑦᑎᒃᑲᓐᓂᖁᓗᒍ ᑐᒃᓯᐊᕈᓐᓇᖕᓂᐊᖅᑐᓂ, ᖃᔅᓰᓇᐅᒐᓗᐊᖅᐸᑕᓗ ᓈᒻᒪᒋᓗᒋᑦ ᐃᑲᔫᑎᐅᖁᓪᓗᒍ ᐃᓕᓐᓂᐊᖅᑎᑕᐅᕙᓪᓕᐊᓂᖕᒧ ᒎᑎᑦᑎᓐᓄ. ᑕᐃᒪᖓᓕᒫᖅ ᒎᑎ ᑭᐅᖃᑦᑕᖅᑐ ᑐᒃᓯᐊᖕᓂᑦᑎᓐᓂ. ᒪᒃᑯᒃᑲᓗᐊᕈᕕᑦ ᑐᒃᓯᐊᕐᕕᖕᒥ ᐱᓕᕆᖃᑕᐅᔪᓐᓇᖅᐳᑎᑦ ᐊᒻᒪᓗ ᐃᓐᓇᖕᓄ ᑲᔪᖏᖅᓴᐅᑕᐅᓗᑎᑦ ᓂᕆᐅᖕᓂᖅᑖᕈᑕᐅᓗᑎᓪᓗ ᐃᓄᖕᓄ. ᒎᑎ ᓴᖅᑭᑦᑎᕙᓪᓕᐊᖏᓐᓇᕐᓕ ᒪᒃᑯᖕᓂᖅᓴᓂᒃ ᐱᕙᓪᓕᐊᖏᓐᓇᖁᓪᓗᒋ ᓯᕗᓕᖅᐸᓪᓕᐊᖏᓐᓇᕐᓗᑎᒡᓗ ᐱᔪᓐᓇᖕᓂᖃᕐᓗᑎᒡᓗ ᐋᖅᑭᒃᓯᒪᑦᑎᐊᕐᓗᑎᓪᓗ ᑲᔪᖏᑦᑎᐊᕐᓗᑎᒡᓗ ᐃᓄᖕᓂ.

With thanks to the Rev. Samantha Kublu for the translation of Bishop Joey’s article.